Sunday, November 20, 2005


مرات لما اقعد جذي اسرح بيني وبين نفسي
افكر
بصديقاتي والناس الي اخالطهم
بالنت
او برا النت

منو قدكم افكر فيكم كلكم
^_______^

بس
الشي الي يحز بخاطري
لما احد من الناس الي اعرفها
يستقوى على ضعيف
مثلا بما إنة ضعيف كل الغشمرة
على هالضعيف
من غير مراعاة انة بشر
ويحس ولة مشاعر
وكانة الي يتغشمرون
هذيل كاملين
شغلة اتنرفز
ويوميا اشوفها عندي

بما إني طالبة ليلحين
وادرس بمعهد
وهالكروس والحمدالله مابقالة شي
على نهايتة
لكن في هالشي الي يضايقني
من زميلات
عندي بكلاسي زميلة
طبعا ضغط كلة عليها
لان ماتعرف تتحجى واتدافع عن نفسها

صايرة احسن من الكل الي يكسرون فيها
وماترد عليهم وتسكت
لكن على قولة المثل
"الي مالة لسان ياكلة الخنفسان"
^
^
^
خخخخخخ خوش مثل ها؟؟
ابوي كلا ايقولة حقي لوووول
^_______^

المهم
هالبنت مشكلتها مشكلة
والله مرات ودي ابجي عليها من كثر ما انا مكسور خاطري عليها
إهيا مالها صديقات
صابتها مشكلة خلت اهلها يفقدون ثقتهم فيها بسبب زميلة لها بالمعهد
وحدة استاذنت منها وطلبت منها تالافونها
طبعا ماردتها
عطتها التالافون ،، والي استاذنت منها
بكل بساطة غرقت بعسل مع رفيجها واهيا تستخدم تاالافون البنت
لما ردت بيتهم البنية طبعا عادي اتعرفون البيت في خوات او اخوان عادي ياخذون تالافونات بعض
المهم
وصل مسج من الشاب على تالافون البنت
وشافوة اهلها وفقدو كل ثقتهم فيها
وشكو انة ابنيتهم اتحاجي شاب
طبعا شي يكسر بالخاطر انة الواحد يحس انة مظلوم
المهم صارت يوميا اشوفها اتدق على اهلها من تالافون المعهد
ليتاكدون انها موجودة داخل
المهم
اهيا مرات تهتم بنفسها وتتسنع تصير كاااشخة ومرات لا
كلش ماتهتم
البنات قامو يحطون عليها انها باليوم الي اتحط في مكياج
بهاليوم مواعدة ..!!
على كثر ما اهيا تستخدم تالافون المعهد علشان تاكد اهلها انها موجودة
بالمعهد يحسبونها تحاجي شباب بتالافون المعهد شوفو البنات شقاعدين يفكرون..!!!
وطعن بهالبنت لالة اول ولا تالي..!!

ولكن،،
سؤالي يطرح نفسة
لما انشوف انسان اقل منا
ليش مانحترم انة انسان؟؟
ليش مانقدر انة هالانسان حالة.. حالة اي بشر كان
ليش مانحط الف ومليون سبب على ظروف كل انسان؟؟
وليش مانعرف انة كلنا سواسية عند رب العالمين
ليش الطنازة الي مالها داعي على بعض؟؟
ليش مانعدل بعض إذا احد غلط؟؟
وليش نحسب في ناس اقل منا؟؟
ليش مانعرف انة هالشي مو من مبادئنا كمسلمين؟؟
وليش وليش وليش؟؟
كلها اسئلة تطرح بعضها
واتدور عندكم اجابة لها

12 comments:

الاء سعود المجيبل said...

احلى ما في البنت انها تطنش وما ترد عليهم...:)

لانهم سخيفين بالنهايه...:)

ليش ما تحاولين تصادقينها اكثر...:)

الاء سعود المجيبل said...

ونسيت اقولج مبروك على الشكل اليديد...:)

والله مرتب وصورة البنت حلووووه....:)

SILVER RAIN said...

q8tya


صج انه احسن شي سوتة انها
ماترد عليهم
لكن اهما قاعدين يسولوفون فيها
بكل مكان ،، ويخلون بنات غير مايعرفونها
يتطمشون بعد عليها
مادري هالبشر ليش جذي عقلياتهم كانهم الكاملين ولهم الكمال كلة

بصراحة ما انكر اني صداقتها
واحبها اتصير بشلتي المحرحة ^___^

SILVER RAIN said...

كويتياةة

الااااااااااااااااااه يبارك فيج

ويخيلج يعنييييييييي اكشخ

^_____________^


مو نفس كضماوي

الي حتمنييييييييي تحتيييييم


:"""""""""""""(

اوناة اهيييييييت كضماوي

الي عيب على بلوجي

:"""""""""""(

نون النساء said...

مشابهه لصديق طائر بلا وطن

يا سلفر إرضاء الناس غاية لا تُدرك

انتي مو بمقدورج اتغيرين البشر والخصال السيئه فيهم كلهم..!!

البنت اذا كانت زينة خلاص ما عليها من حجي الناس لكن بحالة هالصديقة هذي انصحيها خليها تكون اشوي جريئه

وتدافع عن نفسها

ابوي دايما يقوللي اللي ما يكون ذيب بهالزمن تاكله الذياب..

صادقيها وعلميها ممكن يكون في اشياء خافيه عليها وممكن جدا تكون عارفه باللي يصير لكنها مطنشه..

بس هذا كله بيرجع سلبي عليها

ياويلي من هالبنات ويلااه

شياطين مادري رياحين؟؟؟

kazmawy said...

عن الحش يا بنات...تييك التهايم وانت بالدوام :)

شوفى سالفة البنت انا دايما اقول
كل من يشوف الناس بعين طبعه
والحديث فلا بنات الناس صعب والواحد يخافه على اهله وخواته
والله يستر علينا وعلى بنات المسلمين
وترى الصور مالت البنية الى حاطتهابالبلوق حلوة
:)

طائر بلا وطن said...

العزيزة سيلفر
......

احس اني بنفجر .. طبختيني و انا بمكاني

يستضعفونها
يشوهون سمعتها و احنا في مجتمع ما يرحم البنت
يمكن ينهون حياتها و مستقبلها بهالكلام

و افرضي مثلا مثلا لو غلطت .. انتو تعرفون شنو صار بالضبط و شنو كانت نيتها هالبنت؟

و بعدين لو الواحد غلط .. خلاص خلاص مافي خط رجعه .. ما يمكن الإنسان يتغير و يتعدل و يبدي حياة يديدة

شي يقهر .. يحر .. يبط الجبد
.
.
.
حاولي لو قدرتي تعلمينها .. و الله تكسبين اجر فيها

أما قطيع الخمه -اسمحيلي- الله بينتقم منهم..و يليتني موجود بس يليتني

آسف و سلام

طائر بلا وطن said...

نسيت .. صدمتيني بالموضوع

بس المثل خلاني اتأكد انج سلفر مو احد ثاني:p

بآخذ المثل و احطه يم معلقة نون النساء

سلام:)

SILVER RAIN said...

نون

شياطين من جهنم اشوي عليهم صراحة
يعني مادري اهما يسوون الذنب بعشر وكانة عادي ،، لما وحدة ما لها ولا عليها يستقوون عليها

شغلة تقرف بصراحة ..!!

SILVER RAIN said...

كضماوي


لووووووووووووووول
ماحشيت اوناة ولاه بريئة

:"""""""(

المشكلة هذا المثل الي قلتة كلن يرا الناس بعين طبعة لكن لما يتم الطعن على انسان ضعيف،، هالشي ظلم علشان يكون نفس ماينقال طماشة القعدة كانة مايخافون من ربهم اييهم احد يطعن في ظهرهم نفس مايطعنون بالبنت

SILVER RAIN said...

طائر بلا وطن

فعلا صادقتها اشوي وقمت بطريقتي
ابعد عنها بنات الي يستقوون عليها اشوي
لكن الله كريم ويارب يبعد عنها الناس الغثيثين لساناتهم



عندي سؤال؟؟
@@ شسالفة انك تاكدت اني سلفر؟؟

SILVER RAIN said...

willy

اصبت الهدف فعلا

الناس لا تاكل الا الجريح منها

ولكن الله قادر عليهم ان لم يخافو ربهم بالسنتهم